HERE'S TO THY HEALTH, MY

BONNIE LASS.

TUNE-Laggan Burn.

HERE'S to thy health, my bonnie lass
Guid night, and joy be wi' thee;
I'll come nae mair to thy bower-door,
To tell thee that I loe thee.
Oh dinna think, my pretty pink,
But I can live without thee:

I vow and swear I dinna care
How lang ye look about ye.

Thou'rt aye sae free informing me
Thou hast nae mind to marry;
I'll be as free informing thee
Nae time hae I to tarry.
I ken thy friends try ilka means,
Frae wedlock to delay thee;
Depending on some higher chance-
But fortune may betray thee.

I ken they scorn my low estate,
But that does never grieve me;
But I'm as free as any he,

Sma' siller will relieve me.

I count my health my greatest wealth,
Sae long as I'll enjoy it :

I'll fear nae scant, I'll bode nae want,
As lang's I get employment.

But far off fowls hae feathers fair,
And aye until ye try them:

Tho' they seem fair, still have a care,
They may prove waur than I am.

But at twal at night, when the moon shines bright,

My dear I'll come and see thee;

For the man that loes his mistress weel,
Nae travel makes him weary.

HEY FOR A LASS WI' A TOCHER. TUNE-Balinamona ora.

AWA wi' your witchcraft o' beauty's alarms, The slender bit beauty you grasp in your

arms:

Oh, gie me the lass that has acres o' charms, Oh, gie me the lass wi' the weel-stockit farms.

CHORUS.

Then hey for a lass wi' a tocher, then hey for a lass wi' a tocher,

Then hey for a lass wi' a tocher-the nice yellow guineas for me.

Your beauty's a flower, in the morning that blows,

And withers the faster, the faster it grows : But the rapturous charm o' the bonnie green knowes,

Ilk spring they're new deckit wi' bonnie white yowes.

And e'en when this beauty your bosom has blest,

The brightest o' beauty may cloy, when possest;

But the sweet yellow darlings wi' Geordie imprest,

The langer ye hae them, the mair they're

carest.

HEY, THE DUSTY MILLER.

TUNE-The Dusty Miller.

HEY, the dusty miller,
And his dusty coat;

He will win a shilling,
Or he spend a groat.
Dusty was the coat,
Dusty was the colour,
Dusty was the kiss

That I got frae the miller.

Hey, the dusty miller,
And his dusty sack;
Leeze me on the calling
Fills the dusty peck-
Fills the dusty peck,
Brings the dusty siller;
I wad gie my coatie
For the dusty miller.

HIGHLAND HARRY.

My Harry was a gallant gay,
Fu' stately strode he on the plain :
But now he's banish'd far away,
I'll never see him back again.
Oh for him back again!

Oh for him back again!
I wad gie a' Knockhaspie's land
For Highland Harry back again.

When a' the lave gae to their bed,
I wander dowie up the glen;
I set me down and greet my fill,
And aye I wish him back again.
Oh were some villains hangit high,
And ilka body had their ain!
Then I might see the joyfu' sight,
My Highland Harry back again.

HIGHLAND MARY.

TUNE-Catharine Ogie.

YE banks, and braes, and streams around The castle o' Montgomery,

Green be your woods, and fair your flowers, Your waters never drumlie!

There simmer first unfauld her robes,

And there the langest tarry;

For there I took the last fareweel

O' my sweet Highland Mary.

How sweetly bloomed the gay green birk,
How rich the hawthorn's blossom,
As underneath their fragrant shade,
I clasp'd her to my bosom!
The golden hours, on angel wings,
Flew o'er me and my dearie;
For dear to me as light and life,
Was my sweet Highland Mary.
Wi'mony a vow, and lock'd embrace,
Our parting was fu' tender;
And, pledging aft to meet again,
We tore oursels asunder;
But, oh! fell death's untimely frost,
That nipt my flower sae early!
Now green's the sod, and cauld's the clay,
That wraps my Highland Mary !

Oh pale, pale now, those rosy lips,
I aft hae kiss'd sae fondly!
And clos'd for aye the sparkling glance
That dwelt on me sae kindly;
And mouldering now in silent dust
That heart that loe'd me dearly!
But still within my bosom's core
Shall live my Highland Mary.

HOW CAN I BE BLYTHE AND GLAD
TUNE-The Bonnie Lad that's far awa.

OH how can I be blythe and glad,
Or how can I gang brisk and braw,